Иран б д т хәвпсизлик кеңишиниң бир тәрәп қилишиға тапшурулиду

Хәлқара атом ениргийә идарисиға әза дөләтләр, теһранниң ядро қоралларға еришиш мүмкинчиклики туғдурған әндишиләр бойичә, иран ядро мәсилисини б д т хәвпсизлик кеңишигә тапшуруш мәсилисидә пикир бирликигә келәлмиди. Хәлқара атом ениргийә идарисиға әза дөләтләр пәйшәнбә күни австирийә пайтәхти вианнада йиғин чақирип, явропа дөләтлири оттуриға қойған иран ядро мәсилисини хәвпсизлик кеңишигә тапшуруш тоғрисидики тәклип лайиһисини музакирә қилди.

Әмма тәрәпләр мәсилини җүмә күни давамлиқ музакирә қилишқа қошулған. Германийә оттуриға қойған тәклип лайиһисидә иранниң ядро программиси " пүтүнләй тинчлиқ мәқсәдләргә қоллиниш үчүнла әмәс" дейилгән. Атом ениргийә идариси иран мәсилисини хәвпсизлик кеңишигә сунушни қарар қилса, иранға имбарго йүргүзүлүши мүмкин. Әмма иран өз пикиридә чиң туруп, иранни хәвпсизлик кеңишигә тапшурса, дуня униңдин ваз кечишни тәләп қилған уран тавлаш вә ядро қоралларни тәрәққи қилдуруш йолида илгирләйдиғанлиқини агаһландурмақта.

Иран президенти әхмәдиниҗад, " иран ядро мәсилисидә тәһдитләрдин қорқмайду " деди. Атом ениргийә идарисиниң башлиқи барадей, иранни уран тавлаштин ваз кечишкә чақирған. Русийә билән хитай иран ядро мәсилисини хәвпсизлик кеңишидә музакирә қилишқа қошулғандин кейин, германийиниң тәклипини қобул қилиш бәк қийинға тохтимаслиқи мүмкин. Бу икки дөләт мәзкур лайиһини хәвпсизлик кеңиши бу йил 3 - айғичә иранға қарита һечқандақ тәдбир қолланмаслиқ шәрти билән қобул қилди. Йиғинда америка вәкили григорий шулт, " иран даирилиригә хәлқара җәмийәтниң бу ишни хәвпсизлик кеңишигә тапшуруш мәсилисидә җиддий икәнликини ениқ вә кәскин қилип йәткүзүш вақти кәлди " дәйду.

Иранниң радикал исламчилиқи билән тонулған президенти әхмәдиниҗад, бу йил 10 - январда уран тавлашни әслигә кәлтүргән вә исраилийини хәритидин өчүрүветиш керәк, дәп җакарлиған иди. (Әркин)