Iran, atom énérgiye idarisi bilen hemkarlishishni toxtatti

Xelq'ara atom énérgiye idarisi iranning yadro mesilisini birleshken döletler teshkilati bixeterlik kéngishining bir terep qilishigha sunushni qarar qilghandin kéyin, iran hökümiti hazir bu idare bilen bolghan barliq xalisane hemkarliqlarni toxtatti.

Iran tashqi ishlar ministiri manushehr mottaki yekshenbe küni téhranda échilghan muxbirlarni kütiwélish yighinida, iranning xelq'ara atom énérgiye idarisi bilen nechche yillardin buyan élip bériwatqan barliq xalisane hemkarliqlarni toxtitidighanliqini, emma yadro kéngeytmeslik shertnamisigha dawamliq ri'aye qilidighanliqini bildürdi.

Téxi buning aldida iran tashqi ishlar ministirliqining bayanatchisi xemid réza aséfi, gerche atom énérgiye idarisi shenbe küni iran yadro mesilisini b d t bixeterlik kéngishige tapshurushni qarar qilsimu, lékin iran hökümitining yenila söhbet ötküzüshke teyyar ikenlikini bildürgen idi.

Iranning yadro programmisini eslige keltürüshige küchlük qarshi turghan amérikining prézidénti jorj W bush xelq'ara atom énérgiye idarisi chiqarghan bu qararning, dunyadiki her qaysi döletlerning iranning yadro qorallargha ige bolushigha qarshi turidighanliqini ekis ettüridighanliqini bildürdi. Emma rusiye dölet mudapi'e ministiri sérgéy iwanow yekshenbe küni gérmaniyide, iran'gha jaza qollinishning ünümlük chare ikenlikidin guman qilidighanliqini bildürdi. (Peride)