Iran uran tawlash meshghulatini eslige keltürdi

Yadro söhbitige mes'ul yuqiri derijilik iran wekilining seyshenbe küni ashkarilishiche, iran kichik kölemlik uran tawlash meshghulatini resmiy eslige keltürgen. Mezkur emeldar, iranning natanz rayonidiki yadro eslihesi resmiy meshghulat bashlighanliqini jakarlidi. Emma shuning bilen birge iran aliy dölet xewpsizlik komitétining mu'awin sékritari jawad wahidi, téhranning - 20 féwral küni rusiyige bir wekiller ömiki yollaydighanliqini we iran uranlirini rusiye zéminida tawlash pilani üstide muzakire élip baridighanliqini bildürdi.

Xelq'ara atom énirgiye idarisi iran yadro mesilisini b d t xewpsizlik kéngishining bir terep qilishigha yollighandin kéyin, iran rusiye ziminida uran tawlash pilani üstide muzakire élip bérishni toxtatqan we uran tawlash meshghulatini eslige keltüridighanliqini jakarlighan idi.

Jawad wahidi, " prézidént parlaméntning testiqi bilen yadro meshghulatini eslige keltürüsh buyruqi chüshürdi " deydu. Buning aldida iran parlaménti bir qanun maqullap, eger xelq'ara atom énérgiye idarisi iranni xewpsizlik kéngishige tapshursa, yadro meshghulatini eslige keltürüshni qarar qilghan. Iranning herikiti tereplerni endishige salmaqta.

Közetküchilerning eskertishiche, iran amérikining sewr - taqitini tashuriwatidu. " Bügünki amérika" gézitining eng yéngi xelq rayini sinash netijiside körsitilishiche, ray sinash yoqlimisigha qatnashqan amérika puqralirining 60 % i iran yadro qorallirigha érishse, amérikigha qarshi ishlitidu, dep qarighan. Lékin wahidi, iranning keng kölemlik uran tawlash meshghulati bashlighanliqini inkar qildi. Emma wé'annadiki diplomatlar iranning yadro qorallirini ishlepchiqiralaydighan uran tawlash meshghulatini bashlighanliqini bildürmekte. (Erkin)