Iran söhbet ötküzüshke razi boldi

Iranning eng aliy diniy dahiysi haméyni iran hökümiti bilen amérikining iraqtiki weziyetni muqimlashturush mesiliside söhbet ötküzüshini qollaydighanliqini bildürgen.

Amérika awazi radi'osining uchuridin melum bolushiche, haméyni heptining ikkinchi küni téléwiziye nutqi sözligende bu pikirni otturigha qoyup, "eger iran da'iriliri amérikini iranning iraq mesilisidiki köz qarishi heqqide chüshenchige ige qilalisa, bu söhbet ötküzülse bolidu" dégen, u yene eger bu söhbetning iranning menpe'etige uyghun kelmise ötküzelmeydighanliqini eskertken.

Amérika we iran terep bu söhbetning peqet iraq weziyitini muqimlashturush yollirini merkezlik halda muzakire qilishtin ibaret ikenlikini körsitishken bolup, amérika prézidénti jorji bush mezkur söhbet arqiliq amérika da'irilirining iranning iraqta qiliwatqan ishlirining toghra –xataliqini iran'gha chüshendürüp qoyush pursitige ige bolidighanliqini bildürgen.

Prézidént bush iran hökümitini agahlandurup, uni iraqning ishlirigha arilashmasliqqa chaqirghan hemde iraqtiki amérika elchixanisigha iran bilen söhbetlishish hoquqi bergenlikini, amérikining iraning iraqta élip bériwatqan ikki diniy mezhep arisigha ziddiyet sélish qilmishini eyibleydighanliqini körsetken.

Amérika awazi radi'osining uchuridin qarighanda, charshenbe küni baghdadning jenubidiki bir saqchixanisigha hujum qozghighan iraq qoralliq isyanchiliri amérika hem iraq hökümet qoshunliri teripidin tarmar qilinip, 50 isyanchi qolgha chüshken. Jeng ikki sa'et dawamlashqan bolup, qolgha chüshkenler ichide bir neper süriyilikmu bar iken.(Ümidwar)