Bush : iran mesiliside her qandaq tallash yolini chetke qaqmaymiz


2006.04.18
Share on WhatsApp
Share on WhatsApp

Amérika prézidénti jorji bush iranning yadro qorallarni tereqqi qildurushini tosash mesiliside her qandaq tallash yolini chetke qaqmaydighanliqini bildürdi. Prézidént bush bu sözlerni seyshenbe küni aq saraydiki axbarat élan qilish yighinida, iran'gha taktiliq yadro bombisi ishlitish pilani bar - yoqliqini sorighan bir muxbirgha bergen jawabida tekitlidi.

Lékin bushning eskertishiche, amérika hökümitining nöwettiki aldinqi wezipisi mesilini yenila diplomatik yollar bilen hel qilish iken. Buning sel aldida iran prézidénti exmedinijad, iran'gha tajawuz qilishqa pétin'ghan düshmenlerning qolini yenjip tashlaydighanliqini bildürgen idi.

Prézidént exmedinijad sözide isra'iliyini yoqitishni yene bir qétim tilgha alghan. Iran prézidéntining eskertishiche, téhran hökümiti yadro qorallargha érishish hoquqining barliqi mesiliside héchqandaq bir dölet bilen söhbet élip barmaydiken.

Nöwette b d t xewpsizlik kéngishige eza 5 dölet bilen gérmaniye moskwada iran yadro mesilisi boyiche söhbet élip barmaqta. Közetküchilerning eskertishiche, iran da'iriliri ötken hepte qoyuqlandurulghan uran tawlap chiqqanliqini jakarlighandin kéyin, iran yadro krizisida tüp xaraktérlik özgirish bolghan.

Amérika iranning yadro qorallargha érishishigha hergiz süküt qilip turmaydighanliqini agahlandurmaqta. Lékin xitay bilen rusiye iran'gha imbargo qoyush yaki herbiy heriket élip bérishqa qarshi turidighanliqini eskertip keldi. Bu munasiwet bilen xitay yéqinda mu'awin tashqiy ishlarministiri süy tyenkeyni iran'gha ewetken. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.