Иран америкини иранға һуҗум қилиш мәсилисидә йәнә бир қетим агаһландурди

Иран чаршәнбә күни әгәр америка иранға һуҗум қилса, у һалда иранниң америкиниң дуняниң һәр қайси җайидики мәнпәәтигә зиян йәткүзидиғанлиқини агаһландурди. Бу баянат, б д т атом идарисиниң иранниң б д т ниң уран тавлашни тохтитиш өлчимигә чүшидиған , чүшмәйдиғанлиқи һәққидики доклатидин икки күн бурун елан қилинди.

Иранниң юқири дәриҗилик әмәлдари айәтоллаһ әли хаменей телевизорда қилған нутуқида бу сөзләрни қилған болуп, у сөзидә, " америка шуни билиши керәкки, әгәр у бизгә һуҗум қилса, униң дуняниң һәр қандақ йеридики мәнпәәти зиянға учришиши мумкин" деди.

Америка һөкүмити иранниң уран ишләпчиқириш программисини ядро қораллириға ишлитиши мумкинликини нәзәрдә тутуп, иранға ядро программисини тохтитиш җазасини бериш тәклипини оттуриға қойған иди. Бу тәклипни б д т бихәтәрлик кеңишидики әнглийә билән франсийә қоллиди, әмма русийә билән хитай қарши чиқти.

Иран даирилири буниң алдида мәйли б д т бихәтәрлик кеңиши яки атом енергийиси идариси уларға җаза қоллансун, иранниң бу орунлар билән һәмкарлашмаслиққа тәйяр икәнликини билдүрүп, " бизниң алимлиримиз өзлириниң иқтидари билән бу техникиларни яратти. Бизгә сиртниң ярдимиму керәк әмәс" дегән иди. Гәрчә иран даирилири бу атом программисиниң иранда елип бериливатқанлиқини тәкитлисиму, лекин иран узундин бери, русийә мутәхәссислириниң вә пакистандики "атом бомба атиси" дегән намни алған абдул қадир ханниң қарңғу базар содисиға күчлүк тайинип кәлгән.(Пәридә)