Русийә нөвәттә иранға қарши имбарго йолға қоюлишиға қарши чиқти

Җүмә күни русийә, иранға дәрһал иқтисадий имбарго йолға қоюш тоғрисидики һәрқандақ тәшәббусни рәт қилидиғанлиқини билдүрди һәмдә франсийә һөкүмити иран билән тоқунуш тоғрисида агаһландурди. Русийә вә франсийиниң бу һәрикити, 31‏- авғуст күнигичә уран тавлаш паалийитини тохтатмиса, иранға қарши қаттиқ җаза қоллиниш еһтималлиқни йоққа чиқарди.

Иран һөкүмити, б д т бихәтәрлик кеңишиниң даими әзалири болған америка, русийә, хитай, әнглийә вә франсийә қатарлиқ бәш дөләт вә германийиниң уран тавлаш паалийитини тохтитиш тоғрисидики тәлипигә икки бислиқ җавап бәргән. Мәзкур алтә дөләт иранға иқтисадий җәһәттин нурғун ярдәм беридиғанлиқини тәкитләп, әгәр бу тәклипини рәт қилса, иранға қарита имбарго йолға қоюш тоғрисида қарар алидиғанлиқини билдүргән.

Иран сәйшәнбә күни, алтә дөләтниң тәклипигә җавап бәрди. Әмма иран тәклипни рәт қилмиғандәк, уни қобулму қилмиған. Сиясий мулаһизчиләр, иранниң америка, русийә, хитай, әнгилийә, франсийә вә германийә қатарлиқ алтә дөләт тәклипигә мәзкур алтә дөләт оттурисида бу мәсилидә бир ихтилап чиқишиға сәвәп болалайдиған бир җавап қайтурғанлиқини тәкитлигән иди.

Дәрвәқә шундақ болди. Америка, әнгилийә, германийә вә франсийә қатарлиқ дөләт ғәрб дөлити, б д т бихәтәрлик кеңишиниң қарарида чиң турушини, әгәр иран 31‏- авғуст күнигичә уран тавлаш паалийитини тохтатмиса, иранға қарши имбарго йолға қоюш мәсилисини музакирә қилишини тәләп қилмақта. Әмма русийә вә хитай буниңға қарши чиқип, мәсилисиниң сиясий йоллар арқилиқ бир тәрәп қилиниши керәкликини тәкитлимәктә. (Қанат)