Iran söhbet arqiliq yadro pilanini saqlap qalmaqchi

Iran prézidénti maxmud exmedi nijat yekshenbe küni gherb memliketliri bilen söhbet qilish arqiliq yadro pilanidiki ixtilaplarni hel qilishni xalaydighanliqini bildürdi.

En'giliye b b s agéntliqining uchuridin qarighanda, iran islam inqilabining ghalibiyet künini xatirilesh murasimida söz qilghan exmedi nijat bu pikirni bildürgen bolsimu, lékin u iranning yadro pilanidin qet'iy waz kechmeydighanliqini eskertip, yadro pilani mesiliside yol qoyushning dölet menpe'etige xilap qilmish ikenlikini tekitlidi.

Amérika awazi radi'osining uchuridin qarighanda, iranning yadro pilani mesilisi gérmaniyining miyunxén shehiride ötküzülgen dunyawi bixeterlik mesililiri yighinidiki asasliq muzakire témisi bolghan.

Iran yadro mesilisi boyiche söhbet wekili larijani yighinda téhranning ottura sherq weziyitini jiddiyleshtüriwétishni xalimaydighanliqini bildürüp, söhbet arqiliq birleshken döletler teshkilati yadro pilanlirini közitish orgini bilen bolghan talash-tartishliq mesililerni hel qilish layihisi teyyarlishi mumkinlikini otturigha qoyghan. Chünki, b d t atom pilani orgini iranni yadro pilani boyiche tenqid qilip, iran'gha béridighan bir qisim yardemlerni toxtitip qoyghan idi.

Gherb döletliri miyunxéndiki bu ikki künlük dunya bixeterlik yighinidin paydilinip, iran bilen naresmiy shekilde sohbet ötküzüsh arzusini bildürgen. (Ümidwar)