Иран президенти әхмәдиниҗат бушқа хәт язди

Иран прездиенти маһмуд әхмәдиниҗат америка президеинти җорҗ W бушқа хәт йезип, иран ядро мәсилиси һәққидә йеңи тәклипләрни қойған. Бу иран рәһибириниң 27 йилдин буян тунҗи қетим америка президентиға хәт йезиши һесаблиниду.

Бу хәвәрни иран һөкүмитиниң баянатчиси ғолам һүсәйин илһам дүшәнбә күни елан қилған болуп, шу күндә бу хәт теһрандики шивитсарийә әлчиханиси арқилиқ бушқа йәткүзүлидикән. Ғолам һүсәйинниң билдүрүшичә, иран рәһбири әхмәдиниҗат хетидә нөвәттики хәлқаралиқ назук вәзийәт вә хәлқара мәсилиләрни бир тәрәп қилиш һәққидики йеңи тәклипләрни оттуриға қойған.

Мухбирлар баянатчи ғолам һүсәйиндин бу хәтниң тәпсилий мәзмунини, шундақла оттуриға қоюлған тәклипниң америка билән иран оттурисида бивастә сөһбәт елип бериш тәклипи яки әмәсликини сориғинида, у бу хәт очуқ хәт болмиғанлиқи үчүн бу һәқтики мәлуматларни берәлмәйдиғанлиқини ейтқан.

Техи буниң алдида иран президенти әхмәдиниҗат йәкшәнбә күни қаттиқ тәләппузда сөз қилип, әгәр б д т бихәтәрлик тәшкилати иранға җаза қолланса, у һалда иранниң "хәлқара ядро кеңәйтмәслик шәртнамиси" дин чекинип чиқидиғанлиқини тәһдит қилған иди. Нөвәттә униң уштумтут бушқа хәт йезиши, мутәхәссисләрни иран кризисиға қарита азрақ үмидләндүрди. Америка даирилири техи бу һәқтә инкас қайтурмиди. (Пәридә)