Иран хәлқара җәмийәтниң ядро мәсилисидики агаһландурушини мәнситмиди


2006.04.13
Share on WhatsApp
Share on WhatsApp

Иран президенти махмуд әхмәдиниҗад, иранниң талаш - тартиш қозғиған ядро программисидин ваз кәчмәйдиғанлиқини җакарлиди. Гәрчә иран қоюқландурулған уранюм тавлап чиққанлиқини җакарлиғандин кейин хәлқара җәмийәтниң еғир бесимиға дуч кәлгән болсиму, лекин әхмидиниҗад, иранниң ядро ениргийисигә еришиш арзусидин қилчиму ваз кәчмәйдиғанлиқини билдүрди.

Нөвәттә б д т атом енергийә идарисиниң башлиқи муһәммәт әл-барадей, ядро мәсилисидики тиркишишни пәсәйтиш үчүн теһранни зиярәт қилмақта. У, "пәвқуладдә ишларниң оттуриға чиқишидин бурун' иранни уранюм тавлаштин ваз кечишкә қайил қилишни үмид қилимән " дәйду. Ғәрб дөләтлири иранниң мәхпий ядро қораллар пилани бар, дәп гуман қилсиму, лекин иран ядро пиланиниң тинч мәқсәтләр үчүн ишлитилидиғанлиқини билдүрмәктә.

Президент әхмәдиниҗад, алдинқи күни иранниң муваппәқийәтлик һалда қоюқландурулған уранюм тавлиғанлиқини җакарлиғандин кейин, америка ташқий ишлар министири кондилиза райис пәйшәнбә күни б д т хәвпсизлик кеңишиниң иранға қарита җиддий тәдбир қоллинишини тәләп қилди. Райисниң әскәртишичә, иран хәлқара җәмийәтниң агаһландурушини мәңситмәй кәлмәктә, әгәр б д т өзиниң абройини сақлап қалимән десә, иранға қарита җиддий тәдбир қоллиниши керәк. Лекин әхмәдиниҗад пәйшәнбә күни " биз иран дөлитиниң һоқуқи мәсилисидә һечким билән сөһбәт өткүзмәймиз вә һечким бизни буниңдин ваз кечишкә қилчиму мәҗбурлаш һоқуқиға игә әмәс " деди.

Хитай, хәвпсизлик кеңишиниң иранға имбарго қоюш пиланини қобул қилмай кәлди. Иран уранюм тавлап чиқанлиқини җакарлиғандин кейин хитай һөкүмити пәйшәнбә күни ярдәмчи ташқий ишларминистири чүй тйәнкәйни теһранға йоллиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.