Yawropa ittipaqining iran bilen bolghan söhbiti netijisiz ayaqlashti


2006.01.30

Yawropa ittipaqining düshenbe küni béryussélda iran bilen ötküzgen yadro mesilisidiki axirqi söhbiti netijisiz ayaqlashti. Shundaqla en'gliye, gérmaniye we fransiye 3 dölet tashqi ishlar ministirliri düshenbe kechte londonda amérika, rusiye we xitayning tashqi ishlar ministirliri bilen bu mesilide uchrashmaqchi.

Yawropa ittipaqi iran bilen ötküzgen söhbettin kéyin, birleshken döletler teshkilati bixeterlik kéngishini bu yadro majirasigha qol tiqishqa chaqirdi. Béryosséldiki bu yighin iran terepning telipi boyiche chaqirilghan bolup, iran yawropa ittipaqidiki en'gliye, gérmaniye we fransiye döletliri bilen söhbet ötküzüsh arqiliq ularning iran yadro mesilisini b d t bixeterlik kéngishige sunushining aldini almaqchi bolghan.

Söhbetke qatnashqan bir neper en'gliye déplomati, mezkur söhbette yawropa ittipaqining héchqandaq bir yéngiliqni anglimighanliqini éytti. Emma iranning aliy derijilik söhbet wekili bolsa, söhbetning muweppeqiyetlik échilghanliqini hemde yene dawamliq söhbetlishishni xalaydighanliqini bildürdi.

Xelq'ara atom énérgiye idarisimu peyshenbe küni iran yadro mesilisini b d t bixeterlik kéngishige sunush yaki sunmasliq mesiliside jiddiy yighin achmaqchi. Amérika bilen yawropa ittipaqi iranning yadro programmisini eslige keltürüshini eyiblep, ularning bundaq qilish arqiliq yadro qorallirini yasimaqchi boliwatqanliqini tekitleydu. Emma téhran izchil türde buni tinch yoldiki énérgiye türlirige ishlitidighanliqini bildürüp keldi. (Peride)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.