Iran ikki xitay jasusining qolgha élin'ghanliqini élan qildi


2007.08.16
Share on WhatsApp
Share on WhatsApp

Iran edliye da'iriliri charshenbe küni iranning herbiy we yadro eslihelirige munasiwetlik axbarat toplash pa'aliyiti bilen shughullan'ghan ikki neper xitay jasusining qolgha élin'ghanliqini élan qildi. Bu iran da'irilirining xitay puqralirini tunji qétim jasusluq pa'aliyiti élip bérish bilen eyiblep qolgha élishi bolup hésablinidu.

Iran edliye ministirliki bayanatchisi jemshidi, ikki neper xitay puqrasi iranning ottura qismidiki arak shehiri etrapigha jaylashqan herbiy we yadro eslihelirini resimge tartqan hem sin'alghugha alghanliqini we shu seweblik qolgha élin'ghanliqini bildürdi. Iranning arak shehiride quruluwatqan yadro eslihesi xelq'arada talash tartish qozghawatqan qurulushlarning biri bolup, iran bu seweblik gherb döletlirining imbargo tehditige duch kelmekte.

Jemshidining eskertishiche, bu ikki xitay puqrasi sayahetchiler qiyapitide iranning qish arilidiki sayahet menzilgahigha kélip bu yerdin ottura qisimdiki arak shehirige barghan. Iran hazirghiche amérika we en'giliye qatarliq döletlerni iranda jasusluq pa'aliyetliri élip barmaqta, dep eyiblep kelgen bolsimu, lékin xitay bilen bolghan diplomatik munasiwiti nahayiti yaxshi idi.

Xitay tashqi ishlar ministirliki bu weqeni, iranning dölet ehwalini chüshenmeydighan bezi junggo sayahetchilirining irandiki iqtisadiy, siyasiy we herbiy jehette sezgür rayonlarni resimge tartqanliqi seweblik saqchilar teripidin tutup qélinish weqesi, dep élan qildi. Iranning qish arili paris qoltuqidiki meshhur sayahet menzilgahi bolup, iran da'iriliri ikki xitay sayahetchining néme üchün qish arilidin 700 kilométir musapini bésip, iranning ottura qismidiki arak shehirige barghanliqini ashkarilimidi. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.