Xitay bilen rusiye iranni qayil qilish üchün heriketlenmekte

Rusiye we xitay yadro mesiliside otturigha qoyulghan bir teklipni qobul qilishqa qayil qilish üchün iranda élip bériwatqan pa'aliyetlirini tézletti. Xewerlerge qarighanda, eger iran bu teklipni qobul qilsa, b d t ning bu döletke qarshi imbargo yolgha qoyushining aldini élish mumkin iken.

Roytirés agéntliqining xewer qilishiche, 24 ‏- féwral küni, rusiye atom énérgiye idarisining re'isi sirgi kiriyinko we xitay mu'awin tashqi ishlar ministiri lu gawzing yadro mesiliside iran rehberliri bilen söhbetlishish üchün tihran'gha keldi.

Iran bilen énérgiye we soda munasiwetlirini kücheytish üchün tirishiwatqan rusiye bilen xitay iran'gha qarshi imbargo yolgha qoyulushini qollimaydu. Emma iranning xelq'ara jama'etning yadro mesilsidiki teleplirige pisent qilmay, yado programmisini eslige keltürüsh qararida ching turushi, rusiye we xitayning gherb döletlirining yadro mesilsidiki teleplirige awaz qoshushigha seweb bolghan.

Emma xitay we rusiye yenila, b d t bixeterlik kéngishining iran'gha qarita imbargo yolgha qoyushining aldini élish üchün iranni rusiyining teklipini qobul qilishqa razi qilish üchün tirishmaqta. Rusiye, irandiki yadro riyaktorlirida ishlitilidighan uranni rusiyide tawlash teklipini otturigha qoyghan. Iran hökümiti bolsa, rusiyide élip bérilidighan birleshme uran tawlash ishigha xitayning qatnishishini otturigha qoyghan.

Emma gherb döletlirining diplomatliri, iran rusiye bilen bolghan söhbetni uzartish arqiliq b d t bixeterlik kéngishning iran toghrisida bir qarar chiqirishini kéchiktürüshni pilanlawatqan bolushi mumkin déyishmekte. (Qanat)