Бағдат шәһиридә арқа-арқидин партлаш йүз бәрди


2004.09.30

Бағдад шәһириниң ғәрбидики районда пәйшәнбә күни арқа-арқидин партлаш вәқәси йүз берип, аз дегәндә 41 адәм өлди, нәччә он адәм яриланди. Партлашта өлгәнләрниң көпинчиси балилар икән.

Америка бирләшмә ахбарат агентлиқиниң билдүрүшичә, партлаш америка армийисиниң бир машина әтрити бағдадтики йеңидин қурулған су бир тәрәп қилиш завутиниң иш башлаш мурасими өткүзүлгән мәйдандин өткән пәйттә йүз бәргән. Партлаштин кийин, кишиләр яриланғучиларни қутқузуш үчүн барғинида, йәнә арқа- арқидин икки қетим партлаш йүз бәргән.

Буниңдин сирт пәйшәнбә күни бағдадниң ғәрби районида бир америка әскири билән икки нәпәр ирақ сақчиси өзини өлтүрүвелиш характерлиқ партлитиш вәқәсидә өлгән. Америкиниң бир арқа сәп тәминат базисиму ракета һуҗумиға учрап, америка башчилиқидики бирләшмә қошунниң бир әскири өлгән вә йәттә адәм яриланған.

Буниң алдида, ирақтики америка қисимлири бағдадниң ғәрбидики фалуҗа шәһиригә һавадин һуҗум қилған иди. Йәрлик дохтурханиниң билдүрүшичә, һуҗумда үч адәм өлүп, сәккиз адәм яриланған. Толуқ болмиған бәзи мәлуматларға қариғанда, өлгәнләрниң арисида бигунаһ пуқралар бар икән. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.