Baghdat shehiride arqa-arqidin partlash yüz berdi

Baghdad shehirining gherbidiki rayonda peyshenbe küni arqa-arqidin partlash weqesi yüz bérip, az dégende 41 adem öldi, nechche on adem yarilandi. Partlashta ölgenlerning köpinchisi balilar iken.

Amérika birleshme axbarat agéntliqining bildürüshiche, partlash amérika armiyisining bir mashina etriti baghdadtiki yéngidin qurulghan su bir terep qilish zawutining ish bashlash murasimi ötküzülgen meydandin ötken peytte yüz bergen. Partlashtin kiyin, kishiler yarilan'ghuchilarni qutquzush üchün barghinida, yene arqa- arqidin ikki qétim partlash yüz bergen.

Buningdin sirt peyshenbe küni baghdadning gherbi rayonida bir amérika eskiri bilen ikki neper iraq saqchisi özini öltürüwélish xaraktérliq partlitish weqeside ölgen. Amérikining bir arqa sep teminat bazisimu rakéta hujumigha uchrap, amérika bashchiliqidiki birleshme qoshunning bir eskiri ölgen we yette adem yarilan'ghan.

Buning aldida, iraqtiki amérika qisimliri baghdadning gherbidiki faluja shehirige hawadin hujum qilghan idi. Yerlik doxturxanining bildürüshiche, hujumda üch adem ölüp, sekkiz adem yarilan'ghan. Toluq bolmighan bezi melumatlargha qarighanda, ölgenlerning arisida bigunah puqralar bar iken. (Arzu)