Iraqta partlash weqeliri dawamliq yüz bermekte

Iraqning paytexti baghdad we shimalidiki sheher musulda düshenbe küni arqa- arqidin partlash yüz bérip, az dégende 17 ademning ölüshi we yüzge yéqin ademning yarilinishini keltürüp chiqardi.

Roytirs axbarat agéntliqining xewirige qarighanda, 14 adem düshenbe küni baghdadta yüz bergen ikki qétimliq mashina partlash weqeside ölgen. Tunji qétimliq partlash iraq dölet amanliqni qoghdash qisimigha tizimlitish ponkitining etrapida yüz bergen. Ikkinchi qétimliq partlash bolsa, méhmanxanilar rayonida yüz bergen bolup, partlashta alte adem ölgen.

Musuldiki yerlik emeldarlar, musul shehiridiki partlashta az dégende üch ademning ölgenlikini, buning ichidiki ikki kishining partlitishni sadir qilghan kishiler ikenlikini bildürgen. Ularning mashinisidiki bomba muddettin burun partlap ketken.

Iraqta omumiy saylamning yéqinlishishi bilen her xil zorawanliq heriketler ewj alghan bolup, düshenbe küni iraqtiki saqchilarning bir qomandani baghdad shehiri etrapida qestlep öltürülgen. Buningdin sirt, amérika armiyisi muqtada el sadir bashchiliqidiki radikal shi'e musulmanliri igiligen faluja shehirige hawadin hujum qilghan. Bombardimanda yette adem ölgen. Amérika armiye da'iriliri, bu qétimqi bombardimanda qarshilashquchi küchler ishlitiwatqan ikki binaning nishan qilin'ghanliqini bildürmekte. (Arzu)