Amérika we iraq armiyisi fallujaning merkizigiche hujum qilip kirdi

Charshenbe küni iraqta turushluq amérika armiyisi bilen iraq armiyisi birlikte fallujaning merkizigiche bésip kirip, sheherning yérimidin oshuqini kontrol qildi.

Roytéris axbarat agéntliqining xewirige qarighanda, amérika armiyisi yene, fallujadiki qoralliq qarshilashquchi küchlerge dawamliq türde hawadin we quruqluqtin hujum qilmaqta.

Amérika herbiy da'irilirining melum qilishiche, fallujadiki ikki künlük köreshte jem'iy 11 neper amérika eskiri we ikki neper iraq eskiri qaza tapqan. Shundaqla amérika we iraq armiyisi falluja sheherlik hökümet hemde bir qisim asasliq köwrük, qurulush binaliri we meschitlerni ishghal qilip, köp miqdarda qoral we partlatquch boyumlarni qolgha chüshürgen.

Buningdin sirt yene, iraqtiki qoralliq unsurlar charshenbe küni, iraq waqtliq hökümitining bash minisitiri ayad alawining bir nechche tuqqanlirini görüge élip, alawining fallujadin armiye chékindürishini, bolmisa uning tuqqanlirini öltürüp tashlaydighanliqini tehdit qilghan.

Iraqta arqa-arqidin yüz bériwatqan partlash weqeliri we kéler yil béshidiki saylam sewebidin, ayad alawi ikki künning aldida fallujani herbiy haletke ötküzüp, bu yerdiki qoralliq qarshilashquchi unsurlargha hujum qilish buyriqini chiqarghan idi.(Peride)