ئامېرىكا ئارمىيە دائىرىلىرى، فالۇجاھتىكى ئىلگىرى قوراللىق كۈچلەر تەرىپىدىن ئىگىلەنگەن بىر مەسچىتنىڭ ئىچىدىن زور تۈركۈمدە قوراللارنى بايقىغانلىقىنى بىلدۈردى.
ئىراقتىكى ئامېرىكا ھەربىي ئەمەلدارىنىڭ بىلدۈرۈشىچە، ئۇلار فالۇجاھ شەھىرىدىكى تازىلاش ھەرىكىتى جەريانىدا زور تۈركۈمدىكى مىلتىق، بومبا، گرانات ، ئېغىر تىپلىق زەمبىرەكلەر ۋە 700 دانىدەك زەمبىرەك ئوقىنى بايقىغان.
ئامېرىكا دائىرىلىرى، قوراللىق ئۇنسۇرلارنىڭ بۇ قوراللار بىلەن ئىراق دائىرىسىدە ئومۇمى يۈزلۈك زوراۋانلىق ھەرىكىتى ئېلىپ بېرىشقا يىتىدىغانلىقىنى بىلدۈرمەكتە.
ئامېرىكا قوشۇنلىرى ئۆتكەن ئايدا فالۇجاھتىكى ئۆكتىچى قوراللىق كۈچلەرگە قارشى كەڭ كۆلەملىك ھۇجۇم باشلىغان ئىدى. گەرچە ھازىر كەڭ كۆلەملىك ھەربىي ھەرىكەت ئاياقلاشقان بولسىمۇ، ئەمما قوراللىق ئۇنسۇرلارنى تازىلاش ھەرىكىتى داۋاملاشماقتا.
شۇنىڭ بىلەن بىر ۋاقىتتا، ئىراق قىزىل ھىلال جەمئىيىتى فالۇجا شەھىرىدىكى ئىنسانپەرۋەرلىك ياردىمىنى باشلىغانلىقىنى، خادىملىرىنىڭ ئاشلىق يەتكۈزۈش ۋە ئۆلگەنلەرنى دەپنە قىلىش ئىشلىرىغا ياردەم قىلىۋاتقانلىقىنى بىلدۈردى.
بۇ ئارىدا خىتاي ھۆكۈمىتى بايانات ئېلان قىلىپ، ئىراقنىڭ بولغۇسى سايلىمى ئۈچۈن، يەنە بىر مىليون دوللار ياردەم بېرىدىغانلىقىنى بىلدۈردى. بۇنىڭ ئالدىدا خىتاي ھۆكۈمىتى ئىراقنىڭ بىر قىسىم قەرزلىرىنى بىكار قىلىپ، ئىراقنىڭ قايتا قۇرۇلۇش ئىشلىرىغا 25 مىليون دوللار ياردەم بېرىشقا ۋەدە بەرگەن. لېكىن بۇ ياردەمنىڭ قانچىلىكىنىڭ ئەمەلىيلەشكەنلىكى تېخى ئېنىق ئەمەس. (ئارزۇ)