Amérika armiyisi falujahta zor bir türküm qorallarni bayqidi


2004.11.25

Amérika armiye da'iriliri, falujahtiki ilgiri qoralliq küchler teripidin igilen'gen bir meschitning ichidin zor türkümde qorallarni bayqighanliqini bildürdi.

Iraqtiki amérika herbiy emeldarining bildürüshiche, ular falujah shehiridiki tazilash herikiti jeryanida zor türkümdiki miltiq, bomba, granat , éghir tipliq zembirekler we 700 danidek zembirek oqini bayqighan.

Amérika da'iriliri, qoralliq unsurlarning bu qorallar bilen iraq da'iriside omumi yüzlük zorawanliq herikiti élip bérishqa yitidighanliqini bildürmekte.

Amérika qoshunliri ötken ayda falujahtiki öktichi qoralliq küchlerge qarshi keng kölemlik hujum bashlighan idi. Gerche hazir keng kölemlik herbiy heriket ayaqlashqan bolsimu, emma qoralliq unsurlarni tazilash herikiti dawamlashmaqta.

Shuning bilen bir waqitta, iraq qizil hilal jem'iyiti faluja shehiridiki insanperwerlik yardimini bashlighanliqini, xadimlirining ashliq yetküzüsh we ölgenlerni depne qilish ishlirigha yardem qiliwatqanliqini bildürdi.

Bu arida xitay hökümiti bayanat élan qilip, iraqning bolghusi saylimi üchün, yene bir milyon dollar yardem béridighanliqini bildürdi. Buning aldida xitay hökümiti iraqning bir qisim qerzlirini bikar qilip, iraqning qayta qurulush ishlirigha 25 milyon dollar yardem bérishqa wede bergen. Lékin bu yardemning qanchilikining emeliyleshkenliki téxi éniq emes. (Arzu)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.