Baghdattiki partlash weqeliride 26 adem öldi

Iraq paytexti baghdattiki jüme küni yüz bergen ikki qétimliq partlash weqeside, 10 saqchini öz ichige alghan 26 adem öldi. Partlash weqesining biri baghdatning shimalidiki adamiye rayonida yüz bergen bolup, bu yerdiki weqede 14 adem ölgen. Buning sel aldida baghdatning el- ummel rayonidiki bir saqchi ponkiti, qoralliq kishilerning hujumigha uchrighan.

Bezi xewerlerde ikkinchi qétimliq partlashning baghdattiki shi'elerge tewe bir meschitning yénida yüz bergenliki ilgiri sürülse, yene bezi xewerlerde partlashning el- ümmeldiki saqchi ponkiti etrapida yüz bergenliki ilgiri sürülmekte. Ikkinchi qétimliq partlashta 12 adem ölgen.

Iraqtiki islamchilargha tewe bir tor béti, partlash weqeliri abu musab zarqawi bashchiliqidiki tewhid we jihad teshkilati teripidin élip bérilghanliqini élan qilghan. Bu arida iraq hökümet armiyisi we amérika qisimliri bilen bolghan musuldiki toqunushta, iraq qarshiliq körsitish küchlirining 11 adimi ölgen. Amérika armiyisining bir eskiri shimaliy iraqtiki kerkükte öltürülgen. Iraqtiki muqimsizliq kéler yili 30- yanwarda élip bérilidighan saylamning tinch ötküzülishige tehdit dep qaralmaqta. Biraq prézidént bush, iraqtiki bezi sün'i partiyilerning saylamni kéchiktürüsh heqqidiki teklipini ret qilghan. (Erkin)