Ирақ даирилири йәкшәнбә күнидики партлашлар сәвәбидин 50 кишини қолға алди

Ирақ бихәтәрлик хадимлири, йәкшәнбә күни шийә мусулманлири олтурақлашқан наҗеф вә кәрбала шәһиридә йүз бәргән өзини өлтүривелиш характерлик партлитиш вәқәлири билән мунасивәтлик дәп қаралған 50 нәпәр гуманлиқ кишини қолға алғанлиқини билдүрди.

Ирақтики шийә мусулманлириниң муқәддәс җайи һисабланған наҗеф вә кәрбала шәһири йәкшәнбә күни арқа- арқидин өзини өлтүривелиш характерлик һоҗумға учриған. Вәқәләрдә өлгәнләрниң сани ишип, нөвәттә 66 гә йәтти. Буларниң ичидә 52 адәм наҗеф шәһиридики партлашта, 14 адәм кәрбала шәһиридики партлашта өлгән.

Ирақ даирилири партлашларниң сүнни мәзһипидики радикал унсурларниң киләр йили 1 - айда өткүзүлидиған омумий сайламға бузғунчилиқ қилиш һәрикәтлири икәнликини билдүрмәктә.

Ирақтики шийә мусулманлириниң рәһбири дүшәнбә күни муритлирини өзини тутивелишқа чақирип, омомий сайламниң һарписида вәзийәтни җиддиләштүрмәсликни тәләп қилди, шундақла шийә мусулманлирини пүтүн күчини сайламға мәркәзләштүрүшкә чақирди. (Арзу)