Iraqta yene bomba partlash weqesi yüz berdi

Iraq bash ministiri iyad alawining partiye shitabigha yéqin jayda, düshenbe küni özini öltüriwélish xaraktirlik partlash weqesi yüz bérip, ikki iraq saqchisi bilen bir puqra öldi.

Düshenbe küni etigende yüz bergen baghdattiki partlash weqeside, az dégende 20 kishi yarilan'ghan. Amérika tashqiy ishlar ministiri kolin powéll, 30 - yanwarda élip bérilidighan iraqdiki saylamda téximu köp zorawanliq weqeliri yüz béridighanliqini agahlandurdi. Mashinigha qachilan'ghan bomba, iyad alawining partiye ishxanisi etrapidiki qarawulluq ponkitidin ötüshke urun'ghanda partlighan. Weqe yüz bergende iyad alawining ishxanisida yoqliqi ilgiri sürülmekte. Buning sel aldida yekshenbe küni baghdatning shimalidiki partlash weqeside 23 adem ölgen.

Iraqtiki qarshiliq körsitish küchliri, 30 - yanwardiki omumi saylamni ötküzmeslikke pütün küchi bilen tirishmaqta. Iraqtiki eng chong sün'i partiye iraq islam partiyisi, saylamni bayqut qilishqa chaqirghan. Biraq iraq nupusining٪ 60 igilleydighan shi'eler, saylam élip bérishni qollawatidu. Bixeterlik mesilisi amérikini iraqqa téximu köp esker ewetishke mejbur qilmaqta. Amérika prézidénti jorji bush, saylamning waqtida élip bérilidighanliqini bildürüp, saylamni kéchiktürüsh heqqidiki teleplerni ret qildi. Amérika herbiy da'iriliri, iraqtiki 130 ming kishilik eskirining sanini 150 minggha köpeytidighanliqini élan qilghan. (Erkin)