Ирақтики омумий сайлам һарписида, террорлуқ һуҗумлар әвҗ алмақта


2005-01-24
Share

30 - январ күни өткүзүлидиған ирақтики омумий сайламниң йеқинлишиши билән, қаршилашқучи күчләрниң һуҗумлири әвҗ алди.

Ройтирс агентлиқиниң хәвиригә қариғанда, бир нәпәр қораллиқ киши дүшәнбә күни ирақ вақитлиқ һөкүмитиниң башлиқи ияд алавийниң ишханиси әтрапидики бир тәкшүрүш понкитида өзини өлтүривелиш характерлик партлаш вәқәси садир қилип, нәқ мәйданда 10 кишини яриландурған. яриланғанларниң көпинчиси сақчилар икән. Ирақ һөкүмәт даирилириниң билдүришичә, вәқә йүз бәргәндә ияд алавийи ишханида әмәс икән.

Хәвәргә қариғанда, ирақтики қаршилашқучи күчләрниң рәһбири әл зәрқавий башчилиқидики тәшкилат, вәқәниң өзлири тәрипидин елип берилғанлиқини билдүргән.

Шуниң билән бир вақитта, ирақ һөкүмити әл зәрқавийниң юқири дәриҗилик ярдәмчиси абу өмәр әл курдини қолға алғанлиқини елан қилди һәмдә униң ирақтики 32 қетимлиқ партлитиш вәқәсигә мәсол икәнликини көрсәтти. Буниң алдида, әл - зәрқавий үналғу лентиси арқилиқ баянат елан қилип, ирақта пат арида өткүзүлмәкчи болған омомий сайламға қәтий тосқунлуқ қилидиғанлиқини билдүргән.

Америкиниң ирақта турушлуқ баш әлчиси нөвәттә ирақта еғир бихәтәрлик мәсилилириниң мәвҗүтликини итирап қилди. Әмма у йәнә, һәр бир ирақлиқниң биләт ташлиялишиға капаләтлик қилиш үчүн, алақидар тәрәпләрниң әң чоң тиришчанлиқини көрситидиғанлиқини билдүрди. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт