Һәр қайси дөләт рәһбәрлири ирақ сайлимини тәбриклиди


2005-01-31
Share

Дунядики һәр қайси дөләт рәһбәрлири дүшәнбә күни ирақ сайлимини махтап, бу қетимлиқ сайламниң, демократийә, әркинлик вә ирақ хәлқиниң ғәлибиси икәнликини билдүрди.

Америка президенти җорҗ в буш, йәкшәнбә күнидики сайламниң зор ғәлибә қазанғанлиқини вә ирақ хәлқиниң ахири қанунлуқ һалда өз дөлитиниң тәқдирини бәлгиләшкә муйәссәр болғанлиқини билдүрди.

Америка башчилиғидики ирақ урушини йеқиндин қоллап кәлгән, әнглийә баш министири тони блер һәтта бу күнни " ғәлибә күни" дәп сүпәтлиди. Бирләшкән дөләтләр тәшкилатиниң баш кативи кофи аннан пүтүн дуняниң, ирақ хәлқини һәқиқий түрдә өзлириниң кәлгүсигә өзлири игә болушқа техиму риғбәтләндүриши керәкликини билдүрди.

Америкиниң ирақ урушиға қарши туруп кәлгән асаслиқ дөләтләр қатарида русийә президенти виладимир путин билән франсийә президенти җәк ширак бу қетимлиқ ирақ сайлимини " тоғра йолға қарап бесилған муһим бир қәдәм " дәп көрсәтти.

Русийә билән франсийә қатарида ирақ урушиға қарши турған германийиниң ташқи ишлар министири җошика фишерму " ирақ хәлқиниң, дөләт ичидики түрлүк тәһдитләргә қаримастин, өз дөлитиниң тинч вә димократик кәлгүсини бәрпа қилиш йолида көрсәткән ирадиси һәммә етирап қилишқа әрзийдиған йүксәк бир иш" дәп билдүрди.

Шуниң билән биллә хитай һөкүмитиму, бу сайламниң уруш азаплирини тартқан ирақ хәлқиғә муқимлиқ елип келишини үмид қилидиғанлиқини көрсәтти.(Пәридә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт