Рамсфилд, америкиниң ирақ урушида мәғлубийәткә учриғанлиқини рәт қилди

Америка дөләт мудапиә министири доналд рамсфилд, америкиниң ирақ урушида мәғлубийәткә учриғанлиқини рәт қилип, ирақтики америка қошунлирини чекиндүрүшниң вақит җәдвилини бәлгиләш хата, дәп көрсәтти.

Рамсфилд, пәйшәнбә күни америка дөләт мәҗлисидики испат бериш йиғинида, қошун чекиндүрүшниң вақит җәдивели бәлгиләш " терорчиларға һаятлиқ йоли бәргәнлик" болуп қалидиғанлиқини әскәртти. Әмма испат бериш йиғинида америка қошунлириниң парис қолтуқи районидики қомандани җон әбузәйид, ирақтики "террорчиларға" қетилған чәтәллик пидаиларниң сани 6 ай илгирикидин көпәйди, дәп көрсәтти.

Ирақтики америка қошунлири пидаиларниң шиддәтлик қаршилиқиға дуч кәлмәктә. Өткән пәйшәнбә вә чаршәнбә күнлири йүз бәргән бағдаттики партлаш вәқәсидила аз дегәндә 30 адәм өлгән.

Генерал әбузәйид, тунис, маракәш вә алҗирийилик пидаиларниң ираққа сүрийә арқилиқ кириватқанлиқини әскәртип, " сүрийә даирилириниң пидаиларға қолайлиқ яритип бериватқанлиқи яки уларни көрмәскә селиватқанлиқи ениқ болмисиму, әмма бу йәрдики мәсилиниң ачқучи йәнила дәмәшқ," дәп көрсәтти.

Рамсфилд, пидаилар зор чиқимға учриғанлиқини шундақла хәлқниң қоллишдин айрилип қеливатқанлиқини билдүрди. Ирақтики америка қошунлириниң сани 135 миң әтрапида болуп, 170 миң ирақ әскири тәрбийиләнмәктикән. (Әркин)