Amérika urush ayropilanliri elqa'ide panahgahini bombilidi

Amérika urushchi ayropilanliri jüme küni, iraqning gherbiy rayonidiki suriye chégrisi etrapida elqa'ide teshkilatining bir panahgahini bombardiman qildi. Amérika herbiy xadimlirining bildürüshiche, bombardiman netijiside elqa'ide ezaliri yoshurun'ghan bir bina pütünley weyran bolghan we binada yoshurun'ghan 50 kishi ölgen.

Bu arida iraqtiki shiyilerning wekilliri, asasiy qanun layihisini qobul qilish üchün sunniylerning wekillirige yéngi bir teklip bergenlikini bildürdi. Köpchilikke melum bolghandek, iraqta köp sanliqni igileydighan shiyiler we kürdler yéngi asasiy qanun layihisi üstide kélishken. Lékin suni'iylerning wekilliri asasiy qanun layihisining nurghun maddilirigha qarshi chiqmaqta.

Amérika birleshme agéntliqining xewer qilishiche, iraqtiki shiyilerning wekilliri, amérika prézidénti jurj bushning telipige asasen, sunniylerge asasiy qanun layihisini qobul qilish üchün yéngi bir teklip sunushqa maqul bolghan. Amérika hökümiti, iraqtiki qarshilashquchi küchlerning herikitini ajizlitish üchün, qandaqla bolmisun sunniylerning iraqtiki hakimiyette orun élishigha tirishchanliq körsetmekte.

Özi bir sunniy ereb bolghan iraqning mu'awin prézidénti ghazi elyawer, asasiy qanun layihisining shiyiler we kürdler teripidin yézilghanliqini, lékin iraqning, pütün iraq xelqi teng hoquqluq dep qaraydighan bir asasiy qanun'gha éhtiyajliq ikenlikini bildürdi. (Qanat)