Ирақ президенти, асасий қанун лайиһисигә өзгириш киргүзидиғанлиқини билдүрди

Ирақниң президенти җалал тәләбани дүшәнбә күни баянат елан қилип, у вә башқа ирақ күрд рәһбәрлириниң, әрәб дөләтлириниң әндишилирини азайтиш үчүн ирақниң асасий қануниниң бәзи маддилириға өзгәртиш киргүзүш тоғрисида килишкәнликини билдүрди. Әрәб дөләтлири, ирақниң йеңи асасий қануни, ирақниң әрәб дуняси билән болған мунасивәтлирини аҗизлитивитидиғанлиқини билдүрмәктә.

Ирақниң йеңи асасй қанунида, ирақ бир әрәб дөлити әмәс, бир ислам дөлити дәп тонутулған. Вәһаләнки ирақ әрәб иттипақиниң қурғучи әзалириниң бири. Сиясий анализчилар бу маддиниң, ирақ нопусиниң 15٪ ни тәшкилләйдиған көрдләрни хош қилиш үчүн қобул қилинғанлиқини билдүрмәктә.

Ирақтики суннийләр ирақниң йеңи асасий қануниниң мушу маддисиға шундақла асасий қанундики ирақни федерал бир дөләт дәп көрсәткән маддилириға қаттиқ қарши чиққан иди. Улар -28 авғуст күни ирақтики шийә вә күрд рәһбәрләртәрипидин қобул қилинған асасий қанун лайиһисини рәт қилип, мәзкур асасий қанун лайиһисиниң 15 - өктәбир күни өткүзилидиған райи синашта қобул қилинмаслиқи үчүн һәрикәт елип баридиғанлиқини билдүргән.

Президент тәләбани, көрд рәһбәрлириниң асасий қанунға қандақ өзгәртиш киргүзүш тоғрисида келишкәнлики һәққидә ениқ бир мәлумат бәрмиди. (Қанат)