Iraqtiki asasiy qanun saylimi ayaqlashti

Iraqta 15 - öktebir küni élip bérilghan asasiy qanun omumiy saylam axirliship, bélet sanash ishliri jiddiy élip bérilmaqta.

Roytérs agéntliqining xewer qilishiche, bu qétimliq saylamda bélet tashlighan iraqliqlarning sani 15 milyondin ashqan hemde bélet tashlash nisbiti 60% ke yetken. Shundaqla bu, iraq we amérika da'irilirining mölchiridinmu yuqiri bolghan.

Londonda ziyarette boliwatqan amérika tashqi ishlar ministiri kondoliza rays, iraqtiki saylamning ongushluq élip bérilghanliqini tebriklep, "yéngi asasiy qanun belkim alliqachan maqullinip boldi" dep bildürdi.

Saylamning deslepki netijisi düshenbe küni, resmiy bolmighan netijisi peyshenbe küni élan qilinip, eng axirqi resmiy netijisi 10 -ayning 24 - küni jakarlinidiken.

Iraq asasiy qanun saylimining jeryani asasiy jehettin ongushluq bolghan bolup, saylammu asasiy qanun'gha "qoshulush" yaki "qoshulmasliq" tin ibaret addiy bélet tashlash usuli bilen élip bérilghan.

Eger iraqtiki 18 ölkining arisida sünni musulmanliri jaylashqan ottura qisimdiki 3 ölkide 2/3 qisim kishi saylamda qarshi awaz tashlisa, u chaghda iraqning bu yéngi asasiy qanuni pütünley inkar qilinidiken. (Peride)