Baghdatta élip bérilghan özini öltürüwélish xaraktérlik hujumda 4 kishi öldi

Yekshenbe küni, iraqning paytexti baghdatta élip bérilghan bir özini öltürüwélish xaraktérlik hujumda töt kishi öldi. Bu bir nechche heptidin biri iraqta élip bérilghan tunji étimliq özini öltürüwélish xaraktérlik hujum idi. Buningdin bashqa yene iraqning herqaysi rayonlirida yüz bergen partlash we toqunushlarda 20 din köp kishi ölgen.

Iraqning paytexti baghdatta bu yil nahayiti qanliq özini öltürüwélish xaraktérlik hujumlar élip bérilghan bolup, 1 aprildin séntebirning axirlirighiche bolghan waqti ichide élip bérilghan özini öltürüwélish xaraktérlik hujumlarda 700 ge yéqin kishi ölgen. Emma baghdattiki amérika qisimliri we iraq armiyisi teripidin élin'ghan qattiq bixeterlik tedbirliri sewebidin ötken bir nechche hepte ichide özini öltürüwélish xaraktérlik hujumlar xélila azayghan idi.

Yekshenbe küni, baghdatta élip bérilghan özini öltürüwélish xaraktérlik hujumlar 26 - séntebir küni iraq néfit ministirliqi yéqin jayda élip bérilgen hujumdin kéyin, baghdatta élip bérilghan eng qanliq özini öltürüwélish xaraktérlik hujum hésablinidu.

Bu arida, amérika birleshme agéntliqining xewer qilishiche, gerche amérika qisimliri iraqning gherbiy rayonidiki sheherlerde élip barghan bir qatar herbiy heriketliri bilen, iraqtiki qarshilashquchi küchlerning keng kölemlik heriket élip bérish iqtidarini azaytqanliqini tekitligen bolsimu, emma iraq urushida ölgen amérika eskerlirining sani 2000 kishige yéqinlashqan. (Qanat)