Amérika qoshuni iraqning gherbide zor yoqitishqa uchridi

Iraqtiki amérika qisimliri peyshenbe iraqning gherbidiki falujada yüz bergen partlash weqeside zor yoqitishqa uchridi. Amérika herbiy da'irilirining ashkarilishiche, peyshenbe küni yol yaqisigha kömüp qoyulghan bombining partlap kétishi sewebidin amérika déngiz armiyisi piyade qisimlirining 10 eskiri ölgen, 11 kishi yarilan'ghan. Bu amérika qisimliri iraq urushi bashlan'ghandin béri uchrighan eng éghir yoqitishlarning biri.

Partlash weqesi yüz bergende amérika qisimliri bu rayonda charlash élip bériwatqan iken. Amérika déngiz armiyisining piyade qisimliri falujaning gherbidiki ramadida jüme küni keng kölemlik tazilash élip bardi.

Bu xil tazlash heriketlirining bu rayonda 5 - qétim élip bérilishi bolup hisablinidu. Bu xil tazilash heriketlirining meqsiti bu ay ichide ötküzülidighan iraq parlamént saylimidin burun, iraq qarshiliq körsitish küchlirige zerbe bérish iken. Bu arida amérika prézidénti jorji bush memliket ichide iraqtin qoshun chékindürüshni telep qilghuchilarning bésimigha duch kelmekte. Emma u, seyshenbe küni iraqtin qoshun chékindürüsh waqit jediwili élan qilishni ret qildi. (Erkin)