Ирақтики парламент сайлимида шиәләр үстүнлүкни игиллиди

• 
  2006-01-20

Буниңдин 5 һәптә илгири өткүзүлгән ирақ парламент сайлиминиң нәтиҗиси елан қилинди. Сайлам нәтиҗисидин мәлум болушичә, ирақ парламентики 275 орунниң 128 ини шиәләр игиләп, ирақ парламентики әң чоң гуруһ болуп қалған, әмма һөкүмәт тәшкилләшкә йитәрлик санни қолға кәлтүрәлмигән. Кордларниң кордистан иттипақи парламенттики 53 орунни игилиди. Сүннийләр 55 орунни игиләп, парламенттики 2 - чоң гуруһ болуп қалди. Сайламға қатнашқан тәрәпләрниң һечбири қанунда бәлгиләнгән һөкүмәт тәшкилләшкә йитәрлик орунни қолға кәлтүрәлмигәнликтин, тәрәпләр бирләшмә һөкүмәт қуруш йолиға меңиши мүмкин.

Бәзи сүнний әрбаплар биләт ташлаш җәрянида сахтипәзлик қилиш вәқәлири йүз бәргәнликидин шикайәт қилған болсиму, әмма сайламниң адил яки адаләтсизлики тоғрисида ениқ бир немә демиди. Америка даирилири болса сайлам асаси җәһәттин адил елип берилди, дәп қаримақта.

Хәлқара җәмийәт ирақ вәзийитиниң тәрәқиятини диққәт билән көзәтмәктә. Сайламда шиәләрниң биринчи болуп чиқиши кишиләрниң пәризидики мәсилә иди. Әмма кордларниң шиәләрдин кейин 2 - орунни игиләйдиғанлиқи пәрәз қилинған болсиму, бирақ сүнний партийиләр 2 - орунни игилиди. Ирақ вәзийитиниң сайламдин кейинки тәрәққияти ирақниң келәчики нуқтисидин тарихий әһмийәткә игә болуши мүмкин.(Әркин)