Iraq bash ministiri jaffari istipa bérishni ret qildi

• 
  2006-04-05

Iraqning bash ministiri ibrahim el-jaffari amérika we en'gliyining chaqiriqigha qarimastin, iraqning kéler qétimliq hökümitige rehberlik qilishtin waz kéchishni ret qildi.

Jaffari en'gliye b b s radi'o-téléwiye shirkitining ziyaritini qobul qilghanda, iraq parlaméntida köp orunni igiligen shi'e musulmanliri ittipaqining uni bash ministirliqqa kandidat bolushqa saylap chiqqanliqini, shunga buning choqum hörmet qilishqa tégishlik bir "démokratik jeryan" ikenlikini bildürdi.

Jaffari hazirghiche az sanliq teshkilatlarning qollishigha érishelmigenliktin, hökümet qurushqa amalsiz qalghan. Uning üstige jaffari yene iraqtiki shi'e musulmanliri teshkilatlirining ichki qismidimu barghanséri qollashtin chüshüp qalmaqta. Hazir jaffarining kandidat salahiyiti hökümet qurush mesilisidiki asasliq ixtilap bolmaqta.

Bu arida iraqning mu'awin prézidénti adil abdul maxdi hazir iraqta bash ministir jaffarini qollaydighanlar sanining köp emeslikini hemde uning emdi texttin chüshüsh waqtining yétip kelgenlikini éytqan. Jaffari, iraqtiki shi'e xelq eskiri qoralliq qisimlirining qet'iy qollighuchisi dep qarilidu. Shundaqla kishiler bu qoralliq qisimni iraqta mezhepler arisidiki majragha qutratquluq qilghan dep eyibleydu. (Peride)