Iraqta herbiy toqunushlar dawamlashmaqta

Iraqta yéngi qurulghan hökümetning bash ministiri nuri elmaliki, bixeterlik mesilisining yéngi hökümetning eng muhim wezipisi ikenlikini bildürdi. Lékin siyasiy we herbiy mulahizichiler, iraqtki toqunushlarning yene uzun waqit dawamlishishi mumkinliqini bildürmekte.

Amérika prézidénti jurj bush iraqta qurulghan we shi'eler, sünniyler we kürdlerdin teshkil tapqan yéngi hökümetni, urushta yéngi bir basquch dep medhiyligen idi. En'giliye bash ministiri toni biliyer bolsa, iraqta térrorchiliq heriketlirini dawamlashturrush üchün héch bir bahane qalmidi dep körsetken.

Lékin iraqta seyshenbe küni yüz bergen hujum we partlitish heriketliri bu dölette tinchliqning ornitilishigha xéli waqit kétidighanliqini körsetti.

Seyshenbe küni iraqning paytexti baghdadta yüz bergen toqunush we partlashlarda, az dégende 22 kishi ölgen. Emma hujum we partlitish heriketlirining üzlüksiz dawamlishiwatqanliqigha qarimay, iraqning yéngi bash ministiri küch ishlitishnimu öz ichige alghan qattiq tedbirler arqiliq, iraqta tinchliqini qaytidin ornitidighanliqini tekitlimekte.

Xewerlerge qarighanda, qarshilashquchi küchlerge zerbe bérip, ularning hujumlirining aldini élish üchün amérika herbiy qisimliri we iraq armiyisi baghdad, ramadi qatarliq iraqning birnechche shehiride birlikte keng kölemlik tazilash heriketliri élip bérishni pilanlimaqta. (Qanat)