Iraqtiki partlitish weqeliride az dégende 40 nechche kishi öldi

Düshenbe küni iraqning her qaysi jaylirida yüz bergen partlitish weqeliride az dégende 43 kishi ölgen. Bularning arisida baghdattiki iraq armiyisining sünniy musulmanlar olturaqlashqan rayondiki bir charlash etritining etrapida yüz bergen partlitish weqesi eng éghir bolup, 12 kishi ölgen.

Qoralliq küchlerning baghdattiki hujumi asasliqi xelqler olturidighan aptobuslar, iraq saqchi organliri we birleshme armiye herbiy mashinilirini nishan qilghan. Bu yil bashlinip hazirghiche bolghan 5 ayning ichide iraqta yüz bergen her xil hujumlarda iraq bixeterlik qisimliri we puqraliridin bolup 4 mingdin oshuq kishi ölgen.

Bu arida düshenbe küni baghdatta sabiq iraq prézidénti sadam hüseyin we uning 7 neper shiriki üstidin échilghan sot dawam qilip, aqlighuchi tereptin 8 neper shahit guwahliqtin ötti. Sadam hüseyin we uning shirikliri 1982‏- yilida 148 shi'e musulmanlirining ölüshini keltürüp chiqarghan qirghinchiliq jinayiti bilen eyiblen'gen bolup, ular üstidiki sot seyshenbe yene dawam qilmaqchi.

Buningdin 7 ay awal sadam hüseyinning soti bashlan'ghandin buyan, sadamning ikki neper aqlighuchi adwukati étip öltürüldi. Buni sadamni duja'il qirghinchiliqigha jawabkar dep qaraydighan kishilerning sadir qilghanliqi mölcherlenmekte. (Peride)