Iraqtiki elqa'idening yéngi rehbiri belgilendi

Iraqtiki elqa'ide teshkilati ötken hepte, amérika herbiy qisimlirining bir qétimliq hujumi jeryanida öltürülgen mezkur teshkilatning rehbiri ebu musab elzerqawiyning ornigha ebu hemze elmuhajir isimlik bir militanning teyinlen'genlikini bildürdi.

Amérika birleshme agéntliqining xewer qilishiche, ebu hemze elmuhajirning kim ikenliki téxi éniq melum emes, emma pütün militanlargha oxshash yalghan isim ishletken bu kishining elmuhajir famil isimini ishletkenliki, uning iraqliq emeslikini körsitidu. Xewerde éytilishiche, iraqliq bolmighan bir kishining iraqtiki elqa'ide teshkilatining rehbiri bolup saylinishi, bu teshkilatning yenila bashqa bir dölettin kelgen bir erebning kontrolluqida qalghanliqining bir ispati hésablinidiken.

Xewerlerge qarighanda, iraqtiki yerlik qarshilashquchi küchler bilen elzerqawiy otturisida urushni qandaq élip bérish mesilside ixtilaplar mewjut bolup, amérika we iraq hökümet xadimliri bu ixtilaplardin paydilinishqa tirishqan.

Siyasiy we herbiy mulahizichilarning bildürüshiche, ebu hemze elmuhajirning iraqtiki elqa'ide teshkilatining rehberlikige saylinishi, mezkur teshkilatning elzerqawiyning toqunushlarni iraq chégrisi sirtigha toshup chiqish herikitini dawamlashturidighanliqini körstidiken. (Qanat)