Iraqta özini öltürüwélish xaraktérlik hujumlar yenila dawamlashmaqta

Shenbe küni iraqning her qaysi sheherliride élip bérilghan özini öltürüwélish xaraktérlik hujumlarda köpinchisi saqchi xadimi 60 din artuq kishi ölgen.

Eng qanliq hujum iraqning paytexti baghdadning dora rayonidiki saqchi idra'isining aldida yüz berdi. Bir kishining partlatquch dorisi qachilan'ghan bir yük mashinisini partilitishi netijiside 20 kishi ölgen. Iraq saqchi da'irilirining bildürüshiche, ölgenlerning 14 y saqchi we 6 si binada ishlewatqan ishchilar iken.

Bir nechche heptidin béri minglighan amérika we iraq herbiy qisimliri toqunushlarni toxtitish üchün baghdad shehiri we etrapida tazilash heriketliri élip barmaqta. Gerche bu heriket netijiside iraqtiki diniy guruppilar otturisidiki toqunushlar azayghan bolsimu, emma özini öltürüwélish xaraktérlik hujumlar yenila dawamlashiwatidu.

Amérikida iraq urushigha bolghan qarshiliq künséri küchiywatqan bir mezgilde, prézidént bush iraqqa yene 30000 amérika eskiri ewetishke teyyarliniwatidu. Bu amérika eskerliri asasen baghdad we etrapini qarshilashquchi küchlerdin tazilash we rayonda tinchliqni qaytidin tiklesh üchün élip bériliwatqan herbiy heriketlerge yardem béridiken.

Emma démokrat partiyining hakimiyitidiki amérika dölet mejlisi jüme küni 2008‏- yili 1‏-sintebir künini amérikining herbiy qisimlirini iraqtin chikindürüsh küni qilip békitish toghrisida qarar qobul qildi. (Qanat)