Xitay néme üchün bu yéghin'gha qatnashti?

Yéqinda msirning qizil déngiz boyidiki sharm elsheyx shehiride iraq mesilisi heqqide ötküzülgen xelq'araliq yéghin toghrisida bir maqale élan qilghan siyasiy mulahizichi doxtur muhemmet shemsiddin mugalomatis, bu yéghindin iraq mesilisini bir terep qilish mesiliside héchqandaq netije chiqmighanliqini bildürdi.

Doktor mugalumatis 5‏-ayning 14‏- küni amérikida chiqidighan amérika kronikel gézitide élan qalghan maqalisde, yéghin'gha qatnashqan döletlerning asasliq meqsidi iraqtiki musulman xelqning menpe'etlirini qoghdap, iraqta tinchliqni tiklesh emes, özlirining milliy menpe'etlirini ilgiri sürüshtin ibaret boldi dep körsetken.

Doktor mugalumatis maqaliside, xitay hökümitining yéghin'gha qatnashqanliqini buning eng janliq misali qilip körsitip," xitay néme üchün bu yéghin'gha qatnashti? biz, sherqiy türkistanda öz hakimiyiti astida yashawatqan millyonlighan türki xelqlerni basturuwatqan xitay hökümet wekillirining yéghinda qilghan sözlirining semimiy ikenlikige qandaqmu ishinimiz ? turpandiki, xotendiki we ürümchidiki musulmanlarning ehwaligha köngül bölüp qoymighan xitayning,kerkük we musuldiki musulmanlarning ehwaligha köngül bölüwatqanliqigha qandaqmu ishen'gili bolsun?" dep tekitligen.

Maqaliside, sharm elsheyxtiki yéghin'gha, iraq mesilisi bilen héchqandaq alaqisi bolmighan nurghun dölet we teshkilatlarning qatnashqanliqini bildürgen mugalomatis, shuning üchün bu yéghinda iraq mesilisini bir terep qilish toghrisida konkrét qararlar qobul qilinmighan" dep körsetken. (Ömer qanat)