Ирақтики вәзийәт йәнила җидди һаләттә турмақта


2007.08.23
Share on WhatsApp
Share on WhatsApp

Ирақ сақчи даирилири, суний әрәбләр билән әл қаидә күчлири оттурисида бағдатниң шәрқий шималидики баккуба шәһиридә тоқунуш йүз берип, аз дегәндә 23 адәмниң қаза қилғанлиқини билдүрди.

Пәйшәнбә күни йүз бәргән партлашта әл қаидә күчлири икки кәнткә һуҗум қилип, 3 нәпәр яшни вә бир мәсчитниң имамини өлтүргән. Баккуба аһалиси әл қаидә күчлиригә қайтурма зәрбә берип, бир қисим адәмлирини өлтүргәндин кейин, әл қаидә әзалири 5 аялни гөрүгә еливалған.

Америка армийисиниң билдүрүшичә, бирләшмә қошун пәйшәнбә күни баккуба вә униң әтрапидики бир қанчә шәһәрләрдә һәрбий һәркәт қозғап, әл қаидә билән мунасивити бар террорлуқ гумандарини өлтүргән вә 10 кишини қолға алған. Чаршәнбә күни сақчи идарисида йүз бәргән өзини өлтүрүвелиш характерлик һуҗумда 24 адәм өлгән, 80 адәм яриланған.

Бу арида буш һөкүмитиниң пат арида ирақ һәққидә доклат елан қилидиғанлиқи билдүрүлмәктә. Пәрәзләргә қариғанда, доклатта ирақ баш министири маликиниң ирақта йүз бериватқан мәзһәпләр оттурисидики ихтилапларни бир тәрәп қилишиға гуман билән қарайдиғанлиқи, һазирға қәдәр ирақниң сиясий вәзийитидә һечқандақ бир өзгиришниң мәйданға кәлмигәнлики шуңа ирақтики бирләшмә қошунни чекиндүрүшкә болмайдиғанлиқи тәкитлинидикән.(Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.