Iraq we afghanistandiki düshmen küchlirining hujumi kücheymekte

Baghdattiki shi'e musulmanliri olturaqlashqan bir rayonda, shenbe küni yüz bergen mashina partiltish hujumida 60 adem qaza qilghan, 130 adem yarilan'ghan.

Mezkur partlash weqesi, ötken charshenbe küni, amérika we iraq armiyisi birlikte qarshiliq körsetkü'echilerge tazilash herikitidin kéyin baghdatta yüz bergen, eng köp adem qaza qilghan bir qétimliq hujum hésablinidu.

Gerche iraq armiyisi, charshenbe künidin étibaren élip bérilghan birleshme tazilash herikitidin kéyin, baghdattiki jinayi heriketlerning 80 % azayghanliqini bildürgen bolsimu, emma amérikining ali derijilik herbiy qomandanliri yenila, qarshiliq körsetküchi küchlerning bir muddet yoshurunup, qayta hujum qozghash pilani tüziwatqanliqini perez qilishmaqta.

Bu arida afghanistandiki taliban hujumliriningmu küchiyiwatqanliqi bildürülmekte. Amérika armiyisining ashkarilishiche, yekshenbe küni afghanistanning jenubida bir herbiy tik uchar ayrupilanining haleketke uchrap, amérika eskerliridin 8 nepiri hayatidin ayrilghan 22 si yarilan'ghan.

Amérika herbiy da'iriliri, bu weqeni düshmen bilen alaqisi yoq dep, ayrupilan hadisige uchrashtin burun uchquchining, ayropilanda mesile chiqti dégenlikini tekitlidi.

Biraq taliban küchliri, ayropilanning özliri teripidin étip chüshürülgenlikini bildürmekte. Nöwette, afghanistandiki taliban küchlirining hujumlirimu kücheymekte. (Eqide)