Сабиқ хитай дипломати австралийидә хитай ишпийонлуқ тори барлиқини билдүрди


2005.06.06
Share on WhatsApp
Share on WhatsApp

Хитайдин йүз өрүп, австралийә һөкүмитидин сиясий панаһлиқ тилигән хитай дипломати чин юңлин австралийидә хитайниң 1000 дәк кишидин тәшкил тапқан ишпийонлуқ тори барлиқини билдүрди.

У буни, шәнбә күни седний шәһиридә өткүзүлгән 4 - июн вәқәсиниң 16 йиллиқини хатириләш паалийидә ашкарилиған. 37 яшлиқ чин юңлин әслидә хитайниң седнийдики консулханисиниң сиясий ишларға мәсул консули болуп, у хизмәт муддити тошуштин бир һәптә бурун хизмитидин айрилип, австралийә һөкүмитидин сиясий панаһлиқ тилигән.

Чин юңлин өзиниң сиясий панаһлиқ тилишидики сәвәбни хитай һөкүмитиниң сиясий өктичиләрни бастуруш қилмишиға чидап туралмиғанлиқтин дәп билдүргән. У йәнә, өзиниң авистралийидики өктичиләрниң паалийәтлирини назарәт қилишқа мәсул қилинғанлиқини ашкарилиған.

Әмма хитай һөкүмити, уни авистиралийидә қелиш үчүн ялғанчилиқ қилмақта дәп әйиблимәктә.

Мәлуматларға қариғанда, австралийә һөкүмити униң сиясий панаһлиқ тәлипини рәт қилған. Әмма у қоғдаш характерлик визиға еришәләйдикән.

Чин йүлиңниң сиясий панаһлиқ тилигән вақти дәл, австралийә билән хитай сода алақисини күчәйтип, әркин сода келишими түзүш үчүн сөһбәт өткүзиватқан бир пәйткә тоғра кәлгәчкә, униң илтимаси австралийә һөкүмитини оңайсиз һаләткә чүшүрүп қойған. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.