Америка хитайни әң чоң ишпийонлуқ тәһдити дәп қарайду

Франсийә агентлиқиниң 6- март хәвиригә қариғанда, америка мәркизи ахбарат идарисидики бир юқири дәриҗилик әмәлдарниң билдүрүшичә, хитайниң җасуслуқ органлири америкиниң юқири техника йеңилиқлирини оғрилашни нишан қилған ишпийонлуқ органлири ичидә әң актип икән.

Америка дөләтлик җасуслуққа қарши туруш иҗраийә идарисиниң башлиқи җоил бреннер, вашингтон вақит гезитигә ейтқан сөзлиридә, куба, русийә вә иран қатарлиқ дөләтләрниң иккинчи орунда туридиғанлиқини билдүрди. У : " бу органлар бизниң нисивимизни йәватиду" дегән . У йәнә, хитай җасуслири америкиниң илғар техникилирини оғрилашта " наһайитиму қарамлиқ билән " һәрикәт қиливатиду, улар даим биз техи техникиларни толуқ тәрәққи қилдуруп болғичә қолға чүшүрүп болиду, дәйду.

Җоил бреннерниң идариси һазир катирина ляң әнзисиниң зиянлирини баһалаватқан икән. Катирина ляң лос анҗилслиқ содигәр аял болуп америка федератсийә тәкшүрүш идарисиниң учур тәминлигүчиси иди. У 2003 ‏- йили бейҗиңға җасус болуп ишләп бәргән дәп әйибләнгән.

Җоил бреннерниң билдүрүшичә , катирина ляң хитайниң җасуслуқ органлириниң мәхпий хадими болуп, униң америка федератсийә тәкшүрүш идарисиниң җасуслуққа қарши турғучи икки нәпәр юқири дәриҗилик хадими җәймис смит вә бил клевиландлар билән җинсий мунасивити бар икән.

" Мана бу һәқиқий җасуслуқ һәрикити, наһайитиму оңушлуқ елип берилған типик "ширин тозақ" җасуслуқ һәрикити" дәйду җоил бреннер. (Җүмә)