Муһәммәд пәйғәмбәрниң һәҗиви рәсими ғәзипини қозғиған мусулманлар наразилиқ һәрикәтлирини давам қилди


2006-02-06
Share

Тәрәпләрниң өзини тутувелиш чақириқиға қаримай мусулманлар муһәммәд пәйғәмбәрниң һәҗиви рәсими бәзи явропа гезитлиридә елан қилинғанлиқиға қарши давамлиқ наразилиқ билдүрди. Бәзи дөләтләрдә наразилиқ билдүрүш һәрикити зораванлиққа айланди.

Афғанистанда намайишчилар билән сақчилар оттурисида тоқунуш йүз берип, 5 адәм сақчилар тәрипидин етип өлтүрүлди. Һиндистанда мусулман оқуғучилар данийә байриқини көйдүрди. Кәшмирдә дүшәнбә күни наразилиқ билдүрүш сәвбидин сода тохтиған. Теһранда иранлиқ намайишчилар авистрийә әлчиханисиға көйдүргүч бомба атти. Өткән шәнбә вә йәкшәнбә күнлири сүрийә билән ливанда намайишчилар данийә билән норвигийиниң бу дөләтләрдики әлчиханилириға от қоювәткән. Норвигийә билән данийә сүрийә даирилирини намайишчиларниң әлчиханиға һуҗум қилишини тосимиди, дәп әйиблиди. Америка һөкүмити сүрийә даирилириниң қоллиши болмиса, бу хил әһвалниң йүз бәрмәйдиғанлиқини билдүрмәктә. Пакистан болса 9 явропа дөлитидики баш әлчилирини чақиртивалди.

Данийидә чиқидиған " җилландс постен" гезити өткән йили 9 - айда муһәммәд пәйғәмбәрниң һәҗви рәсимлирини елан қилғандин кейин, явропадики бәзи гезитләр бу рәсимләрни қайта басқан. " Җилландс постен гезити" мусулманлардин әпу сориған болсиму, бирақ вәзийәт буниң билән тинҗимиди. Намайиш африқидики мали, нигерийә қатарлиқ дөләтләргичә кеңәйгән. Б д т баш катипи кофи аннан, мусулманларни " җилландс постен гезити" ниң әпусини қобул қилишқа чақирған. Франсийә ташқий ишлар министири филип досте блазий, тәрәпләрни өзини тутувелишқа чақирди. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт