Ислам өлималири рим папасиға хәт язди


2006.10.13

Рим папаси 16‏- биндикитниң 12 ‏- сентәбир күни германийә зиярити җәрянида ригинсбирг университетида ислам дини вә һәзрити муһәммәт әләйһссалам һәққидә қилған сөзлири ислам дунясида қаттиқ наразилиқ қозғиған иди. Рим папаси бир нәччә қетим баянат елан қилип, сөзлириниң хата тәбирләнгәнликини, бу сөзлири билән мусулманларни рәнҗиткәнлики үчүн қаттиқ әпсусланғанлиқини билдүргән.

Җүмә күни дуняниң һәр қайси дөләтлиридики 38 ислам алими рим папаси 16‏- бинидикиткә хәт йезип униң ислам диний вә һәзрити муһәммәт әләйһиссалам һәққидә қилған сөзлири тоғрисидики чүшәндүрүшини қобул қилғанлиқини билдүрди.

Франсийә агентлиқиниң хәвәр қилишичә, босния, хараватия, мисир, иорданийә, косова, әрәп бирләшмә хәлипилики, русийә, түркийә, өзбекистан вә ирақ қатарлиқ 10 дөләттә турушлуқ диний алимлар тәрипидин йезилған бу хәт йәкшәнбә күни рим папасиниң иорданийиниң пайтәхти аммандики вәкилигә берилидикән. Хәттә ислам диний өлималири рим папасиниң германийидә ислам дини һәққидә қилған сөзлири тоғрисида бәргән чүшәндүрүшини қобул қилидиғанлиқини вә бу сөзлири түпәйли ислам дунясидин шәхси кәчүрүм сориғанлиқини бу мәсилә һәққидики талаш-тартишларни тохтитиш үчүн йитәрлик дәп қарайдиғанлиқини билдүргән.

Америкиниң лос анҗилс шәһиридә чиқидиған исламика журнилида елан қилинған бир хәвәрдә ейтилишичә, ислам өлималириниң бу һәрикити уларниң рим папаси билән мунасивәтләрни яхшилаш арқилиқ, ислам дуняси билән ғәрб дуняси оттурисида мәвҗут мәсилиләрни бир тәрәп қилиш тәшәббусиниң бир бишарити һесаблинидикән. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.