Etles köynek kiygen islandiye naxsha cholpini shangxeyde tibet musteqilliqini küylidi

Xewerde éytilishiche, bjorkning naxsha kéchiliki 2 - mart yekshenbe küni shangxey xelqara gimnastika merkizi zalida ötküzülgen. AFP Photo

En'giliye b b s radi'o ‏- téléwiziyisining xewer bérishiche, islandiyilik ammiwi uslubta naxsha éytish cholpini bjork, xitayda ötküzgen yalghuz kishilik naxsha kéchilikide etles köynek bilen sehnige chiqip, tibet musteqilliqini küyligen.

Xewerde éytilishiche, bjorkning naxsha kéchiliki 2 - mart yekshenbe küni shangxey xelqara gimnastika merkizi zalida ötküzülgen bolup, bjork naxsha kéchilikining xatimiside ézilgen milletlerning musteqilliq xitapnamisi mezmun qilin'ghan " musteqilliq élan qilish" namliq naxshini orunlap tibet! tibet! dep yuqiri awazda küyligen.

Shangxeyde olturaqlashqan en'gliyilik bir tamashibinning teswirlishiche, kéchilikke qatnashqan shangxeylik amma buningdin rahetsizlen'gen bolup, uzun'gha qalmay,arqa -arqidin kéchiliktin chiqip kétishken.

Gerche, xitay hökümiti hem axbarat da'iriliri bu heqte hazirgha qeder héch qandaq uchur élan qilmighan bolsimu, emma bezi xitay tor betliride,gerche islandiyilik naxsha cholpini bjorkning éytqan naxshisining mezmunini chüshen'güchiler unche köp bolmisimu uning tibet musteqilliqini küyligenlikini tenqid qilidighan munaziriler xéli kücheygen.

B b s ning söretlik xewiride ipadilishige qarighanda bjork naxsha kéchilikide etlestin kiyim kiyiwalghan.

Közetküchiler, xitay hökümitining mezkür weqeni yoshurghanliqining özi, buninggha qarita siyasiy sezgürlükining ipadisi, bu weqedin kéyin xitay hökümiti chet'el sen'etkarlirining xitay ichidiki pa'aliyetlirini yenimu qattiq kontrol qilishi mumkin dep qiyas qilmaqta. (Gülchéhre)