Prézidént bush, isra'iliyige yehudiy mehellilirining qurulushini toxtitish heqqide nesihet qildi

Amérika prézidénti jorji bush seyshenbe küni téksastiki shexsi qoruqida, isra'iliye bash ministiri ariyol sharunni kütüwélip, isra'iliye da'irilirining gherbiy qirghaqtiki pelestin ziminida yehudi mehellilirini yasash qurulushini toxtitishni telep qildi.

Prézidént bush, isra'iliyining xelq'ara tinchliq pilanigha choqum emel qilishini telep qildi. Xelq'ara tinchliq pilanida isra'iliyining gherbiy qirghaqtiki pelestin ziminlirida yehudiy mehellilirini qurushi cheklen'gen. Prézidént bush mundaq dédi: men shuni özlüksiz eskertip keldim, isra'iliye choqum tinchliq yol xeritisige emel qilishi shundaqla gherbiy qirghaqtiki yehudiy mehellilirining qurulushini cheklishi kérek."

Isra'iliye bash ministiri sharun, yéqinda gaza we gherbiy qirghaqning bir qisim jayliridiki 8 ming yehudiy köchmenni chékindürüsh pilanini testiqlighan. Amma yérusalémning sherqidiki jaylarda 3 ming yehudiy qorusi qurushni maqullighan idi.

I'ordan deryasining gherbiy qirghiqidiki ziminlarni toluqi bilen öz ichige almighan pelestin döliti, pelestinliklerde guman tughduridiken. Sharun, rayondiki yehudiy mehellilirining hemmisi isra'iliyining kontrolliqida bolidighanliqini bildürgen.

Prézidént bush, isra'iliye -pelestin chégrisini 1949 - yildiki urush toxtitish kélishimi boyiche ayrish emeliyetke uyghun emes, dep körsetti. Amma u, bu mesilini hel qilishning charisi choqum isra'iliyilikler bilen pelestinlikler otturisidiki kélishim, dep eskertti. (Erkin)