Исраилийә әскәрлири ғәззидики йәһудилар билән тоқунушуп қалди


2005-08-16
Share

Йәһудиларниң ғәззә районидики олтурақ җайлиридин чиқип кетиш һәрикити ахирқи басқучқа қәдәм қойғанда, исраилийә бихәтәрлик қисминиң, бу йәрдин көчүп кетишкә унимиған йәһудилар билән тоқунушуп қелиш вәқәлири арқа-арқидин йүз бәрди.

Әнглийә б б с радио-телевизийә ширкитиниң хәвиригә қариғанда, ғәззә районида олтурақлишивалған йәһудилар исраилийә армийисиниң өйләрни мәҗбурий көчүрүп маңған машинилириниң алдини тосивелип, әскәрләр билән тутушуп қалған, нәтиҗидә исраилийә сақчи даирилири 50 кә йеқин йәһудини тутуп кәткән.

Ғәззә районидин көчүп чиқишқа унимиған йәһудийлар һәтта машиниларниң чақлириға от қоюп, сақчи машинилириға от йеқилған ботулкиларни атқан. Тоқунушта һазирғичә бир сақчиниң яриланғанлиқи мәлум.

Исраилийә һөкүмити чиқарған уқтурушта, ғәззидә олтурақлишивалған йәһудилар сәйшәнбә күни йерим кечидин бурун ғәззә районидин пүтүнләй чиқип кетиши керәклики буйруқ қилинған.

Бу буйруқни чиқарған исраилийиниң баш министири ариал шарон телевизорда сөзлигән нутуқида, "ғәззә вә ғәрбий қирғақ районидин чиқип кетиш толиму қайғулуқ бир қәдәм. Лекин биз ғәззә районини мәңгүлүк игәлләп туралмаймиз. Чүнки у йәрдә 1 милйондин ошуқ пәләстинликләр бар. Униң үстигә уларниң нопуси һәр он йилда бир һәссә көпийиватиду" дәп билдүргән.

Бу арида ғәззидики пәләстинликләр йәһудиларниң бу йәрдин чиқип кетишини тәнтәнә қилиш үчүн чоң байрамға тәйярлиқ көрмәктә, һәтта нурғунлири пәләстиндики һаммас қораллиқ тәшкилатиниң намайишиға қатнашқан һәмдә бу йәрдики исраилийиликләр билән пәләстинликләрни айрип туридиған тамларға байрақлирини қадиған. (Пәридә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт