Isra'iliye eskerliri ghezzidiki yehudilar bilen toqunushup qaldi

Yehudilarning ghezze rayonidiki olturaq jayliridin chiqip kétish herikiti axirqi basquchqa qedem qoyghanda, isra'iliye bixeterlik qismining, bu yerdin köchüp kétishke unimighan yehudilar bilen toqunushup qélish weqeliri arqa-arqidin yüz berdi.

En'gliye b b s radi'o-téléwiziye shirkitining xewirige qarighanda, ghezze rayonida olturaqlishiwalghan yehudilar isra'iliye armiyisining öylerni mejburiy köchürüp mangghan mashinilirining aldini tosiwélip, eskerler bilen tutushup qalghan, netijide isra'iliye saqchi da'iriliri 50 ke yéqin yehudini tutup ketken.

Ghezze rayonidin köchüp chiqishqa unimighan yehudiylar hetta mashinilarning chaqlirigha ot qoyup, saqchi mashinilirigha ot yéqilghan botulkilarni atqan. Toqunushta hazirghiche bir saqchining yarilan'ghanliqi melum.

Isra'iliye hökümiti chiqarghan uqturushta, ghezzide olturaqlishiwalghan yehudilar seyshenbe küni yérim kéchidin burun ghezze rayonidin pütünley chiqip kétishi kérekliki buyruq qilin'ghan.

Bu buyruqni chiqarghan isra'iliyining bash ministiri ari'al sharon téléwizorda sözligen nutuqida, "ghezze we gherbiy qirghaq rayonidin chiqip kétish tolimu qayghuluq bir qedem. Lékin biz ghezze rayonini menggülük igellep turalmaymiz. Chünki u yerde 1 milyondin oshuq pelestinlikler bar. Uning üstige ularning nopusi her on yilda bir hesse köpiyiwatidu" dep bildürgen.

Bu arida ghezzidiki pelestinlikler yehudilarning bu yerdin chiqip kétishini tentene qilish üchün chong bayramgha teyyarliq körmekte, hetta nurghunliri pelestindiki hammas qoralliq teshkilatining namayishigha qatnashqan hemde bu yerdiki isra'iliyilikler bilen pelestinliklerni ayrip turidighan tamlargha bayraqlirini qadighan. (Peride)