ئامېرىكا بىرلەشمە ئاگېنتلىقىنىڭ بۈگۈن بەرگەن خەۋىرىگە ئاساسلانغاندا، ھۇجۇملار داۋامىدا ھىزبۇللا ھەرىكىتىنىڭ ئەسكەرلىرىدىن 5 ئۆلتۈرۈلگەن، ئىككى نەپەر ئىسرائىلىيە ئەسكىرى يارىلانغان.
ئىسرائىلىيە ئارمىيىسىنىڭ باياناتچىسى ، ئىسرائىلىيە قىسىملىرىنىڭ چېگرا ئاتلاپ، لىۋان چېگرىسى ئىچىدىكى ھىزبۇللا ھەرىكىتىنى تار - مار قىلىشنى نىشان قىلىپ ئېلىپ بارغان 8 قېتىملىق ھاۋا ھۇجۇمىدا ھىزبۇللا ھەرىكىتىنىڭ ئاساسلىق ئورنى ۋە ئوق دورا ساقلاش ئامبىرىنى بىت - چىت قىلغانلىىقنى بىلدۈردى.
ئىسرائىلىيە 7 - ئاينىڭ 12 - كۈنى ئىككى نەپەر ئەسكىرىنىڭ گۆرۈگە ئېلىنغانلىقىنى باھانە قىلىپ، لىۋانغا قارىتا قوراللىق ھۇجۇم ئېلىپ باردى. مەزكۈر ھۇجۇم بۈگۈنگە قەدەر لىۋاندا 310 كىشىنىڭ ئۆلۈمىنى مەيدانغا كەلتۈردى. بۇ جەرياندا ھىزبۇللا ھەرىكىتىنىڭ جەڭچىلىرى، 29 ئىسرائىيىلىكنى ئۆلتۈرگەن.
ئىسرائىلىيە تەرەپ يەنە، لىۋاندا ئېلىپ بارغان ھۇجۇمى داۋامىدا، ھىزبۇللا ھەرىكىتى ھەربى كۈچىنىڭ 50 % ىنى تارمار قىلغانلىقىنى بىلدۈرمەكتە.
ئىسرائىلىيە باش مىنىستىرى ئاھۇت ئالمۇرتنىڭ ئېيتىشىچە، لىۋانغا قارىتىلغان ھۇجۇم ، ئىككى نەپەر ئىسرائىلىيە ئەسكىرى ئەركىنلىككە چىققىچە داۋاملىشىدىكەن.
لىۋان ھۆكۈمىتى بىلەن خەلقئارا جەمئىيەت ئىسرائىلىيىنىڭ ۋە ھىزبۇللا ھەرىكىتىنىڭ ئۇرۇشنى توختىتىشىنى تەشەببۈس قىلغان بولسىمۇ ، ئەمما بۇ ھەقتە بىر ئۆزگىرىش مەيدانغا كەلمىدى. (ئەقىدە)