Шарон пәләстин дөлити қурулушиниң мумкинчилики һәққидә бишарәт бәрди

Исраилийә баш министири арил шарон пәйшәнбә күни ахшими һәрзилия шәһиридә өткүзүлгән бир йиғинда сөз қилип, әгәр пәләстинлик милитантлар исраилийигә қарши елип бериватқан һуҗумлирини тохтатса, мустәқил бир пәләстин дөлити қуралайдиғанлиқиниң бишаритини бәрди.

Исраилийә баш министири сөзидә, ясир арапатни тинчлиқ йолидики асаслиқ тосалғу дәп әйибләп, 2005 - йилиниң яхши пурсәтләр билән толған бир йил икәнликини көрсәтти. У сөзидә йәнә, биз ниң алдимизда наһайити яхши бир пурсәт туриду. Йәнә қачан бундақ бир пурсәтниң келидиғанлиқи мәлум әмәс. Шуңа бу пурсәтни қолдин бәрмәй, пәләстинликләр билән келишишимиз керәк, диди.

Әмма пәләстин рәһбәрлири шаронниң сөзлиридә йеңи бир немә йоқ икәнликини тәкитлиди. Пәләстинликләрниң рәһбири ясир арапатни рамалладики сарийида үч йилға йеқин қамал қилип, униң рамалладин айрилишиға рухсәт бәрмигән арил шарон һөкүмити ясир әрапатниң саламәтлик әһвали җиддиләшкәндин кейин, андин униң давалиниш үчүн франисйигә беришиға рухсәт қилған. Арапат 11 – ноябир күни франсийидики һәрбий дохтурханида вапат болди.

ясир әрапатниң өлүмидин кейин, исраилийә һөкүмити униң орниға сайлинидиған пәләстин рәһбири билән оттура шәрқтә тинчлиқни қайтидин тикләш үчүн һәмкарлишип ишләйдиғанлиқини билдүрмәктә.

2005 - Йили 9 - январ күни арапатниң орнини алидиған пәләстин рәһбирини сайлап чиқиш үчүн пәләстиндә омуми сайлам өткүзүлмәкчи.

Америка бирләшмә агентлиқиниң хәвәр қилишичә, пәләстиндә өткүзүлидиған сайламда нөвәттики әң күчлүк кандидат пәләстинниң сабиқ баш минситири мәһмуд аббас икән (қанат)