Пәләстин билән исраилийә пат арида уруш тохтитиш келишими имзалиши мумкин


2005.02.07

Әң йеңи хәвәрләргә қариғанда пәләстин билән исраилийә пат арида уруш тохтитиш келишими имзалап, икки тәрәп оттурисидики 4 йилдин бери давамлишиватқан тоқунушқа хатимә бериши мумкин.

Ройтерс ахбарат агентлиқиниң хәвәр қилишичә, келишимни исраилийә баш министири арийол шарун билән пәләстин рәһбири махмуд аббас, сәйшәнбә күни мисирда учрашқанда имзалайдикән. Пәләстин тәрәпниң баш сөһбәт вәкили саад әрәкат, пәләстин - исраилийә рәһбәрлириниң сәйшәнбә күни мисирда өткүзүлидиған башлиқлар йиғинидин кейин, икки тәрәп рәһбәрлириниң уруш тохтитиш келишимигә имза қойидиғанлиқини җакарлиған. Исраилийә тәрәп уруш тохтитиш келишими имзалинидиғанлиқини етирап қилған. Әрәкатниң билдүрүшичә, келишим исраилийә қошунлирини ғәрбий қирғақтин чекиндүрүш шундақла түрмидики пәләстинлик мәһбусларни қоюп бериш мәсилисигиму четилидикән.

Буниңдин сәл илгири оттура шәрқни зиярәт қилған америка ташқи ишлар министири кондилиза райис, пәләстин рәһбири махмуд аббас шундақла исраилийә баш министири арийол шарунлар билән көрүшүп, һәр иккила тәрәпни келишим түзүшкә үндигән.

Сәйшәнбә күни елип берилидиған сөһбәт мисирниң қизил деңиз бойидики шарим әл-шәйх саяһәт районида өткүзүлиду. Йиғинға исраилийә - пәләстин рәһбәрлиридин сирт, иорданийә падишаһи абдулла билән мисир президенти һүсни мубарәкләр қатнишидикән. Америка ташқи ишлар министири кондилиза райис, америкилиқ генерал влиям вордни оттура шәрқ сөһбәт вәкили қилип тәйинлигән шундақла президент буш, исраилийә баш министири шарун билән пәләстин рәһбири аббасни вашингтонға тәклип қилған. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.